VIGAN CITY- “Agbalbalinen a teleserye ti impeachment proceeding kontra kenni Chief Justice Maria Lourdes Sereno”.
Dayta iti inpaganetget ni National Union of Peoples’ Lawyers president ken dati a Bayan Muna Rep. Neri Colmenares .
Segun kenkuana, naglalaoken dagiti pammabasol a maibatbato kontra kenni Chief Justice tapno laeng maikkat iti pwesto.
Innayonna, makapaulaw iti impeachment agsipud ta aglalaok dagiti rumrumuar grounds a dagiti dadduma ket saan met a maibilang nga impeachment offense.
Insingasing ni Colmenares a nasaysayaat a leppasen dagiti agpanpanday linteg iti drama da iti impeachment hearing no di ket rugianan dan iti us-usto nga impeachment trial.
Inpaganetget na nga ado iti sabali a trabaho ti Kongreso kas iti panangtratar iti Charter Change ken dagiti nakapenpen a gakat iti Kongreso a kasapulan a maapprubaran.
