VIGAN CITY – Agtultuloy iti imbestigasyon ti Lidlidda Municipal Police Station nu siasino iti akin-rurog iti nasarakan ti maysa nga agkalkali ti kamangeg idiay Sitio Patpat, Barangay Poblacion Norte, Lidlidda.
Segun kenni Police Senior Master Sergeant Iris Lois Pamaran, awan pay laeng iti immasideg kadakuada tapnu mangala wennu mangbigbig a kabagyan da ti nasao a rurog a segun ti PNP Crime Laboratory idiay Candon City ket kukua ti maysa a babai.
Uray kasta, saan nga agsarsardeng dagiti kameng ti Lidlidda PNP tapnu maduktalan da nu siasino ti biktima ken nu anya iti pudno a napasamak.
Maibasar iti panagadal a nakaidalanan ti rurog, adda nakita dagiti eksperto a pagilasinan a natagbat ti biktima, nangruna iti paset ti ulo na isu’t gapu na a naipan idiay national headquarters ti PNP Crime Laboratory tapnu dumalan pay iti naan-anay a panagadal.
Ti agdama, adda pay laeng idiay PNP Crime Laboratory idiay Candon City iti rurog ket nu awan iti mapan mangala wennu mangbigbig, makikinnammayet dan iti umiso nga ahensya tapnu maitabon a nasayaat.
