VIGAN CITY – Agtultuloy ti imbestigasyon ti Magsingal Municipal Police Station iti motibo ti pammaltog idiay boundary ti Magsingal ken Sto. Domingo a nakatayan ni Brgy. Kagawad Arnel Tubon ti Napo,Sto. Domingo.
Iti pannaki-uman ti Bombo Radyo Vigan ken ni PMaj. Joel Castillo, makikamkammayetdan kadagiti pada ti biktima nga opisial ken iti pamiliana pakairamanan ti panangalada iti nayun a CCTV footage para ti naan-anay nga impormasyon a makatulong iti imbestigasyonda.
Agawid koman ti biktima manipud iti talon idin ta sinurot ken inabay dagiti nakamotorsiklo a suspek ket maysa kadakuada ti bimmaba a nangpaltog kenkuana a puon ti nakatayanna.
Insigida a naglibas a nagpaabagatan a direksyon dagiti saan pay a nabigbig a suspek nga ita ket sapsapulen dagiti pannakabagi ti linteg.
Maipalagip a pammaltog met laeng ti nakatayan ti ama ti biktima iti asideg ti lugar a nakatayanna.
