VIGAN CITY – Manarimaan pay laeng iti naun-uneg nga imbestigasyon dagiti kameng ti San Vicente municipal police station iti pannakapapatay ti biktima a ni Jaime Rodiris nga agtawen ti uppat a pulo ket walo nga agnaed idiay Barangay Pudoc Norte, San Vicente a pinaltugan dagiti saan pay nabigbig a suspek idiay Barangay Bantaoay, San Vicente idi January 25.
Agawid kuman ni Rodiris a nakalugan iti tricycle na ta napan na intulod ti ikit na a napan nagbuya ti parada ti Longganisa Festival idi pinaltugan dagiti nakamotorsiklo a suspek.
Nagsagaba ti lima a tama iti paltog iti naduma-duma a paset iti bagi na ti biktima a poon iti nakatayan na uray nu naitaray idiay Metro Vigan Cooperative Hospital para iti pannakataming na.
Ti biktima ket naidarum gapu iti mapapati a panangkabil na ti asawa na ken saan na a panangited ti sustento kadagiti putot na ket itay kallabes, rimuwar iti warrant of arrest kontra kenkuana.
