VIGAN CITY – Kiniddaw ni Northern Luzon Command Spokesman Major Ericson Bolusan kadagiti umili ditoy Region 1 a saan da nga agdanag kadagiti agwarwaras nga alert memo ti social media inaig iti panagraut dagiti terorista ditoy Northern Luzon ta manarimaan pay laeng iti validation iti nasao nga impormasyon.
Segun kenni Bolusan, pudno nga adda iti naawat da nga impormasyon inaig ti posible a panagraut dagiti terorista ngem daytoy ket masapul nga imbestigaran pay a naimbag dagiti intelligence officer ti AFP.
Kinunana, ti nasao nga impormasyon ket para laeng kuma kadagiti intelligence officer ken saan a masapul a maipost ti social media ta saan pay met a napaneknekan iti linaon na.
Ti agdama manarimaanen iti imbestigasyon ti AFP no siasinu ti adda iti likudan iti panagwaras iti nasao nga alert memo tapnu maamuan nu aniya iti napasamak ken kasanu a naiwaras iti social media.
Inbalakad iti opisyal iti publiko nga ituloy da iti inaldaw-aldaw nga ar-aramiden da ken saan da a panunuten iti seguridad da ta kontrolado ti AFP ken dagiti sabali pay a law enforcement agency iti sitwasyon ditoy rehiyon.
Inkari na nga aramiden da amin a kabaelan da tapnu saan a makastrek dagiti managdakdakes ditoy rehiyon.
