Napalaus ti panagyaman ti maysa nga Ilocos Surian ken UP-Diliman graduate a top 1 iti 2025 Architecture Licensure Examination kadagiti timmulong kenkuana tapno maragpat daytoy a balligina iti biag.
Iti pannaki-uman ti Bombo Radyo Vigan ken ni Marissa Ragaza, naragsak ti riknana ta nagbungan ti sangapulo ket dua nga oras a panag-review-na iti inaldaw nga arigna saan payen a rumuar iti kuartona tapno laeng makapokus.
Saanna a ninamnama ti panagbalinna a topnotcher ngem kunana a daytoy ket karaman kadagiti inkarkaragna.
Adda sumagmamano a pammati a sinursurotna ngem ad-adda latta ti panagkararagna iti Namarsua ta sakbay a nagexam ket bimmista kadagiti simbaan kadua ti pamiliana.
Sipud pay kinaubingna ket inarapaapnan ti agbalin nga arkitekto, ket dagiti nagannak, lola ken lolona ti inspirasyonna iti inna panagballigi.
Kinunana met kadagiti saan a nakapasa a normal laeng ti mapaay ngem no arapaap ti maysa a banag ket nasken a bumangon manen ken aramiden ti amin a kabaelan ta adda bukod a ‘timing’ ti kada tao.
Innayonna a masapul laeng a tibkeran ti pakinakem, ken ag-retake ta kas kadakuada ket nariknana met ti maawanan ti namnama idi adda iti kolehio.
