VIGAN CITY – Napadayawan ti Ilocos Sur Provincial Jail babaen ken ni Provincial Jail Warden Raymond Tabios iti naisayangkat a 2022 National Kabalikat Awards and Search for Idols ng TESDA Awarding Ceremony idi August 30, 2022 idiay Tandang Sora Hall, TESDA Women’s Center, TESDA Complex, Taguig City.
Iti pannaki-uman ti Bombo Radyo Vigan ken ni Jail Warden Tabios, sanna a ninamnama ti maala ti provincial jail a 2022 National Kabalikat Award isu a napalaus iti panagyamanna kadagiti amin a timmulong kangrunaan ti Provincial Government of Ilocos Sur babaen ti panangidaulo ni Governor Jerry Singson ken ti partner-da nga ahensya a Technical Education and Skills Development Authority babaen ken ni TESDA Provincial Director Joel Pilotin ken TESDA Specialist II Wendell Botacion.
Segun ken ni Tabios, adda iti maawat ti provincial jail a P10,000 manipod TESDA a ti nasao a gatad ket nagtaud iti region.
Inyunay-unayna a dakkel a dayaw para ti probinsia iti naawatda gapu kadagiti programa ken aktibidad a maisaysayangkat iti uneg iti pagbaludan kaduada iti nasao nga ahensya.
Inlawlawagna nga idiaydiaya ti TESDA iti Technical-Vocational Education and Training (TVET ) a mangted skills kadagiti persons deprived of liberty ken uray kadagiti umili a kayatna a makipaset.
Kasta pay a dagiti nasao a programa ket libre a maipaay, adda dagiti tools a maited ken adda pay allowance nga aramaten dagiti makipagpaset a PDL.
Kabayatanna, ti TESDA Kabalikat Award ket maysa kadagiti kangrunaan a reward mechanism ti TESDA a mangted pammigbig ken dayaw kadagiti outstanding partner-da a kas ti Local Government Units, Legislative, National Government Agencies, Government-Owned and Controlled Corporations, Non-Government Organizations, private business companies wenno organization ken nternational organizations iti kontribusyonda iti panangital-o ken panangpasayaat iti Technical Vocational Education and Training.
