VIGAN CITY – Nangiparuar ti Ilocos Sur provincial government iti baro a travel protocols kadagiti sumrek ditoy probinsia ita a naidalan iti Alert Level 3.
Para kadagiti Authorized Person Outside Residence (APOR) nga aggapu iti Alert Level 2, 3 ken 4 ket kasapulan iti government wenno company ID, vaccination card, proof of transaction in Ilocos Sur nga isu ti Travel Order manipud iti kompania ken mabalin met ti proof of appointment, SPASS, negatibo nga RT-PCR test result a naited iti uneg ti uppat a pulo ket walo nga oras ngem no awan ket mabalin met ti antigen test.
No agtalinaed iti nasursurok ngem duapulo ket uppat nga oras dagiti aggapu iti Level 2, 3 ken 4 ket ti laeng DOT acredited Accommodation Establishment ti masapulda a pagyanan idinto a no aggapu iti Level 4 ket masapulda pay ti ag-log in kadagiti RHU iti lugar a papananda.
Kadagiti fully vaccinated, partially vaccinated ken unvaccinated a frequent border crosser APOR, masapul iti government ID, vaccination card, proof of employment, negatibo nga RT PCR test wenno antigen test result a valid iti dua a lawas no fully vaccinated ken valid iti maysa a lawas met no unvaccinated ken partially vaccinated.
Saan a makastrek dagiti returning resident nga aggapu iti Alert Level 5 ngem dagiti aggapu iti Alert Level 4,3 ken 2 ket masapulda ti ID, vaccination card, proof of residency iti Ilocos Sur, negatibo nga RT-PCR test wenno antigen test result, ken S-PASS.
Dagiti aggapu iti Level 4 ken 3 ket ag-home quarantine iti lima nga aldaw no fully vaccinated ken i-test ida ti LGU iti maikalima nga aldaw ti quarantine-da idinto a no unvaccinated ken partially vaccinated ket masapul iti facility quarantine.
Saan a makastrek dagiti turista a naggapu iti Alert Level 4 ken 5 ngem dagiti aggapu iti Alert Level 3 ken 2 ket masapul iti ID, vaccination card, negatibo nga RT-PCR wenno antigen test result a naited iti uneg ti uppat a pulo ket walo nga oras, accommodation establishment booking confirmation, Tara Na Travel request wenno QR code. Dagiti laeng fully vaccinated adult ken ubbing a kinuyog ti fully vaccinated adults ti makastrek.
Awan ti makastrek a day visitor nga aggapu iti Alert Level 3,4, ken 5 ngem dagiti aggapu iti Alert Level 2 ket masapul ti government issued ID, vaccination card a mangipakita a fully vaccinated, S-PASS ken negatibo nga RT-PCR wenno antigen test result.
Dagiti cargo nga aggapu iti Alert Level 4,3, ken 2 ket masapul iti company ID, vaccination card, proof of delivery, negatibo nga RT-PCR wenno antigen test result, S-PASS, ken no agtalinaedda iti nasursurok ngem duapulo ket uppat nga oras, masapulda ti ag-log in iti RHU ti lugar a papananda. Dagiti identified barracks wenno AEs nga adda Certificate of Authority to Operate-na ti mabalinda laeng a pagyanan.
Dagiti passerby ket ID, ken proof of destination wenno delivery receipts ti cargo vehicles a lumasat.
ID, vaccination card, proof of coordination iti LGU, border pass met ti requirement para kadagiti residente nga agbiahe iti nakurang laeng a duapulo ket uppat nga oras ngem no Alert Level 3 ken 4 ti paggapuanda, masapulda a ma-test ken ag-quarantine kadagiti LGU a papananda.
Kadagiti Returning Overseas Filipino, masurot ti kaudian a resolusyon ti national Inter Agency Task Force.
