VIGAN CITY – Nangiyetnag ni Governor Jerry Singson iti Executive Order No 22 a mangidekdeklarar ti pannakasuspenso ti klase iti amin a lebel ti pampubliko ken pribado a pagadalan kasta payen ti trabaho kadagiti pampubliko a pagopisinaan iti Ilocos Sur inton May 29 kas panagannad iti epekto ti Super Typhoon Betty a nakastreken iti uneg ti Philippine Area of Responsibility ita nga aldaw.
Idi kalman, nagtataripnong ti Provincial Disaster Risk Reduction and Management Council ken dagiti tallopulo ket uppat a Local Government Units ti probinsia kasta payen dagiti maseknan a national government agency ken ti City and Municipal Disaster Risk Reduction Management Office.
Dagiti met ahensia a mangipapaay iti emergency services ken ti disaster risk redudction management, kangrunaan ti Provincial Disaster Risk Reduction and Management Office, local disaster risk and reduction management offices, member offices ti Provincial Disaster Risk and Reduction Management Council pakairamanan dagiti amin nga ospital ken health services ket agtultuloy ti trabahoda tapno masigurado ti pannakaipaay ti serbisyoda kadagiti umili.
Ti met pannakasuspenso ti trabaho kadagiti private business establishments ken offices ket nakadependen iti akinkukua wenno mangidaulo iti maysa nga opisina.
Malaksid dayta, nabilin dagiti LGU nga imonitor ti sitwasyon kadagiti lugarda, kitaen dagiti delikado a lugar ken aramiden dagiti wagas tapno masaluadan ti biag ken sanikua dagiti kalugaranda.
Nabilin pay met ti publiko nga agannad, pagtalinaeden ti public health standards, ken makikammayet kadagiti maseknan nu man bilang kasapulanda ti agbakwit.
