VIGAN CITY – Nangipatuloden ti Ilocos Sur Provincial Disaster Risk and Management Office ti Provincial Rapid Deployment Team idiay Alcala ken Aparri, Cagayan tapno tumulong iti search and rescue operations kadagiti pamilia ken indibidwal a naapektaran iti layus gapu iti bagyo Ulysses.
Malaksid ti dayta, nagipatulod payen ti provincial government ti relief goods a pakairamanan dagiti lupot, taraon, danum ken dagiti school supply a maipaay kadagiti naapektaran nga estudiante.
Dagiti nasao a relief goods ket naggapu kadagiti residente ti probinsia a nagboluntaryo a mangted ti donasyon ken kasta payen dagiti lokal nga opisial.
Nupay kasta, namnamaen ni Governor Ryan Singson nga agtultuloyen a makabangon dagiti naapektaran a residente ken agingga ita ket agawat latta ti opisinana kadagiti donasyon a maipaay kadagiti nabagyo.
