VIGAN CITY – Agsagsaganan ti Ilocos Sur National High School para iti panangipatungpalda iti National Learning Camp a programa ti Department of Education inton Hulyo.
Daytoy a programa ket maikadua a tawenen ti pannakaipatungpalna.
Iti pannaki-uman ti Bombo Radyo Vigan ken ni Eloisa Aquino, Head Teacher ti ISNHS, ti National Learning Camp ket tulonganna dagiti ubbing a saan unay a nalaing iti benneg ti English, Math ken Science.
Babaen iti nasao a wagas ket lumaing dagiti nakapoy nga ubbing ta masurwanda no kasano ti agbasa ken agkontar.
Libre ti NLC isu a maal-allukoy dagiti nagannak nga iparehistroda dagiti annakda a makipaset ta daytoy ket marugian inton Hulyo 1.
Namnamaen ni Aquino a kalpasanto daytoy ket ngumato met ti lebel iti numeracy ken literacy dagiti ubbing iti pagilian.
