Timmulong Provincial Government of Ilocos Sur (PGIS) babaen ti Provincial Disaster Risk Reduction and Management Office – Ilocos Sur (PDRRMO-IS), nadumaduma a Local Disaster Risk Reduction and Management Offices (LDRRMOs), ken General Services Office (GSO) ti 3-day clearing operation gapu ti epekto ti Bagyo Emong ken habagat idiay Bagulin, La Union.
Iti pannaki-uman ti Bombo Radyo Vigan ken ni Provincial Disaster Risk Reduction and Management (PDRRM) Officer Rhon Arquelada, kiniddaw ti Office of the Civil Defense Ilocos Region (OCD-RO 1) ti manpower ken equipment assistance ti PDRRMO Ilocos Sur isu gapu ti augmentation initiative ti probinsia.
Segun ken ni Arquelada, tallo aldaw ti naituding nga pannakikinnamayet ti clearing operations team maipapan ti nasao nga aktibidad a nangrugi idi Lunes, Hulyo 28.
Namnamaen ni Arquelada a malpas ti clearing activity ita nga aldaw kas panangipasiguradona nga siwawaya a tumulong ti PGIS nangnangruna ti rescue teams kadagiti makasapul ti tulong, uneg man wenno ruar ti probinsia.
Kabayatanna, manamnama a makarikna latta ti panagtudo ti intero nga Ilocos Sur agingga ton Domingo, Agosto 3, ta naibayog ti yellow rainfall warning (heavy rainfall) ti intero a probinsia gapu ti habagat, ngem manamnama a sumingising ti init inton Lunes, Agosto 4.
