VIGAN CITY – Siam a pulo ket lima a porsienton a nakasagana ti probinsia nga Ilocos Sur iti panangsangailida iti 2022 Batang Pinoy a marugian inton December 17 ken agpatingga inton December 22.
Iti pannaki-uman ti Bombo Radyo Vigan ken ni Provincial Sports Coordinator Ryan Vera Cruz, dandani aminen malpas dagiti na-rehabilitate a facilities idi kallabes ken uray dagiti playing venues.
Dagiti events a mapasamak iti stadium ket ti athletics a pakairamanan iti running events ken swimming competition idinto a dagiti dadduma nga events ket mapasamak kadagiti nadumaduma nga LGU kas ti San Vicente, Bantay, Sta. Catalina, Vigan ken Caoayan.
Siam met nga events ti maisayangkat iti face-to-face kas ti weightlifting, archery, chess, swimming, athletics, badminton, cycling, table tennis, ken obstacle course race.
Kabayatanna, nakasangpeten dagiti dadduma a delegado ken agtultuloy pay ti panagsangpet ti dadduma.
Apagsangpet dagiti delegado ket dagus nga agparehistroda ta maited dagiti sleeping mats-da sakbay ti panagturongda kadagiti naituding a billeting schools para kadakuada.
Ita nga aldaw met ti panagrugi ti solidarity meeting dagiti nadumaduma nga events nga agpatingga inton bigat sakbay a marugian ti kompetisyon.
Malaksid dayta, impakaammo met ni Vera Cruz a saan pay laeng mabalin nga usaren a pag-joggingan ti oval gapu ti preparasyonda para iti Batang Pinoy.
Pinasingkedan met ni Sports Consultant Jester Singson nga inaldaw ti panagliklikmotda sipud pay idi Nobiembre kaagiti billeting schools a pagtaltalinaedan dagiti delegado tapno siguradawen a nadalus ken nasyaat ti pagyananda.
Segun ken ni Singson, December 9 pay la idi ket naisaganadan dagiti billeting schools a pagturongan dagiti delegado.
Nupay kasta, pagyamanna met dagiti ili ken pagadalan a nakitinnulong kadakuada para iti inda panagsagsagana.
Innayonna a nakurang innem a ribo ti kumpirmado a delegado ita a tawen.
