VIGAN CITY – Inkari ni Ilocos Sur Musical Dancing Fountain Management Head Dante Tacata nga ikagumaan ti provincial government nga iti kabiitan a panawen ket masimpa ti dancing fountain a maysa kadagiti atraksyon ti probinsia.
Segun ken ni Tacata, namnamaenda nga inton umay a lawas ket makapatangda dagiti engineer idiay Korea nga isu ti katulonganda tapno matarimaan ti dancing fountain.
Idi kalman a natakuatanda nga adda perdi ti maysa kadagiti programmable logic controller nga isu ti kapatgan a paset ti dancing fountain isu nga agpatulongda kadagiti engineer ti Korea ta namnamaenda a mairemedyo ket saan a masukatan.
Iti las-ud ti nakurang sangapulo a tawen nga operasyon ti dancing fountain ket ita laeng a mapasamak ti kastoy a parikut.
Nupay kasta, kiniddaw ni Tacata kadagiti turista nga yanusda pay laeng ti pannakaipasardeng ti operasyon ti dancing fountain a nangrugi iti June 18.
