VIGAN CITY – Nakaadayon iti landmass wennu kadagaan ti Aurora ti Bagyo Jenny ket posible nga inton malem wennu inton rabii ket pumanawen ti bagyo.
Ngem uray nu kasta, marikna latta ti Ilocos Region a pakairamanan ti Ilocos Sur, Ilocos Norte, La Union ken Pangasinan, kasta pay ti Cordillera Administrative Region, Cagayan ken Babuyan Islands, Isabela, Quirino ken Nueva Vizcaya ti kalalaingan na agingga napigsa a tudo gapu ti Bagyo idinto nga idiay Central Luzon, Western Visayas, Zamboanga Peninsula, Mindoro Provinces ken Palawa ket mapadasan da ti nakapsot agingga kalalaingan na a tudo.
Naudi a nasaripatpatan itay alas kwatro iti parbangon ti Bagyo Jenny iti kaadayo a sangagasut dua pulo ket lima a kilometro, amyanan a laud ti Dagupan City, Pangasinan.
Agpapa-laud, amyanan a laud ti bagyo iti kabuntog a tallo pulo ket lima a kilometro tunggal oras a ti kapigsa iti angin na ket lima pulo ket lima a kilometro tunggal oras agingga walo pulo ket lima a kilometro tunggal oras.
Gapu ta awanen iti kadagaan ti bagyo, naikkaten iti naibayog a Tropical Cyclone Wind Signal Number 2 kadagiti sumagmamano a lugar ditoy pagilian ngem adda latta dagiti nakaibayugan ti Tropical Cyclone Wind Signal Number 1 kas idiay Cagayan, Isabela, Quirino, Nueva Vizcaya, Apayao, Abra, Kalinga, Mountain Province, Ifugao, Benguet, Ilocos Norte, Ilocos Sur, La Union, Pangasinan, Tarlac, Zambales, Nueva Ecija, Aurora, Pampanga, Bulacan, amyanan a paset ti Quezon, pakairamanan ti Polilio Island.
