“Generally safe” ti nagbalin a sitwasyon kadagiti kalsada kagiddan iti holiday season kas pinasingkedan ti Ilocos Sur Highway Patrol Group.
Iti pannaki-uman ti Bombo Radyo Vigan ken ni PLT Vic Ines, awan ti adu a nakaro nga aksidente iti kalsada a nairekordda malaksid laeng iti napasamak a fatal accident iti siudad ti Cando nidi December 21.
Impannakkel ni Ines nga iti national highway ket awan ti nasalawda a nabartek nga agmaneho, ngem adda sumagmamano kadagiti barangay.
Kagiddan ti agtultuloy a holiday season, pinalagipanna dagiti motorista nga agannad, saan nga awiten ti parikut no agmaneho tapno maliklikan ti aksidente.
Malaksid dayta, kunana pay a nasken a saan nga ipost iti social media no sadino a lugar ti ayan tapno saan a maikkan gundaway dagiti adda dakes a panggepna a mapan kadagiti napanawan a pagtaengan.
