VIGAN CITY – Makabulan iti panagsagana ti 102nd Community Defense Center – 1st Regional Community Defense Group para iti panaghost iti probinsiya ti National Reservist Week inton September 6 ken 7.
Segun ken ni Col. Armand Rico, director ti 102nd CDC, ti nasao nga aktibidad ket manamnama a pakasangailyan to kadagiti amin nga army reservist, pakairamanan dagiti amin a reservist ti Philippine Air Force ken Philippine Navy manipud iti naduma-duma a paset iti pagilian.
Sakbay iti dayta ket aw-awisen amin ni Rico dagiti army reservist ditoy probinsiya ken uray dagiti nagturpos iti basic military training ta makipaset da iti Free Battalion Assembly Test inton August 3.
Inlawlawag iti opisyal a saan laeng a nu panawen iti giyera iti pakakitaan iti serbisyo dagiti reservist ngem ketdi uray kadagiti panawen iti didigra ken dadduma pay nga emergency situation.
Innayon na pay nga awan iti suweldo ti reservist ngem adda dagiti agpanpanday linteg a mangidurduron iti gakat tapnu makaawat da iti allowance ken dadduma pay a benepisyo.
