VIGAN CITY – Kiniddaw ni Police Major Jordan Sambo ken ni Jaypee Alejo nga ag-public apology ken dalusanna ti nagan ti Ilocos Sur Highway Patrol Group iti Facebook kalpasan ti panagpostna iti arungaingna iti panangtiliw kenkuana ti HPG gapu ti idadalanna iti inner lane.
Iti pannaki-uman ti Bombo Radyo Vigan ken ni Sambo, impatungpalda laeng no ania dagiti paglintegan iti kalsada ta basar ti naala ti dash cam, adayo pay laeng ket addan iti inner lane ti traysikel a minaneho ni Alejo.
Innayon ni Sambo a no saanna nga aramiden ket mabalinda nga irefer ti nasao a banag iti Cybercrime Unit ta makita no ania dagiti mabalin a kaso a maipilada kenkuana.
Kabayatanna, inkalintegan met ni Alejo nga awan ti linabsingna a paglintegan ta linisyanna laeng ti nakaparking a trak iti shoulder lane.
Segun ken ni Alejo, no saanna nga inaramid dayta ket mabalin met a rason ti pakadisgrasyaanna ken inlawlawagna a shoulder lane a talaga ti pagdaldalananna.
Kiddawna iti HPG a no mabalbalin ket ibabawida ti nai-issue a ticket kenkuana agsipud ta kunana a narigat ti agsapul ken kompleto met ti dokumentona idi nagbiahe.
