VIGAN CITY – Nagballaag ti Highway Patrol Group kadagiti tattao a malaklakoan iti lugan nga agridamda, iti baet ti kaadda ti baro a “Labas Casa” scheme.
Iti pannaki-uman ti Bombo Radyo Vigan ken ni Police Major Jordan Sambo, mangisaysayangkatdan ti information drive kontra iti daytoy nga iskema a ti kangrunaan a targetna ket dagiti mangisursuro.
Inlawlawagna a daytoy ket pudno a makapasulisog ta dagiti sindikato ket allukoyenda dagiti mangisursuro babaen ti kunada a panangtulongda kadakuada nga ag-loan iti lugan kasukat ti nalaka laeng a requirements, nababa a down payment ken monthly amortization.
Iti daytoy a wagas, saanen a kasapulan dagiti mangisursuro ti agturong kadagiti pagutangan iti lugan ta dagiti ahenten iti mangiproseso ngem ti saan nga ammo dagiti mangisursuro ket maar-aramat laeng ti naganda.
No maaprubaran, awanto met ti sumangpet kadakuada a lugan ngem adda maawatda a notice of payment manipud kadagiti financing institution.
Nupay kasta, balakad ni Sambo kadagiti gumatang iti lugan a siguradwenda a nakainagan kadagiti aglaklako ti gatangenda.
