VIGAN CITY – Nangisayangkat ti Ilocos Sur District Hospital-Magsingal iti aktibidad a naawagan iti “Children’s Fun Health and Activities and Gift Giving” idiay Barangay Puro, Magsingal.
Ti aktibidad ket nagbibinnuligan ti DEOKID Foundation, Ilocos Sur Provincial Government ken Magsingal Local Government Unit.
Iti pannaki-uman ti Bombo Radyo Vigan ken ni Oreo Singson Dela Fuente, Chief Nurse iti nasao nga ospital, napili ti Barangay Puru a pakaisayangkatan ti aktibidad ta isu ti adu ti ubbingna.
Paset iti aktibidad ti pannakaipaay iti taraon, lecture, dental health, raffle, magic show, gift giving, ken pannakaited ti bitamina.
Agsipud ta iti daytoy a bulan ket National Deworming Month, mapurganto met dagiti ubbing kalpasan ti pannanganda ta maysa daytoy kadagiti proyekto ti ospital.
Innayonna a saan laengen nga iti uneg ti ospital ti serbianda no di ket iti payen sibubukel a komunidad tapno matulongan dagiti tattao a mailiklik kadagiti nadumaduma a klase ti sakit.
