VIGAN CITY – Nagballaag ni PLt. Col. Greg Guerrero iti Ilocos Sur Provincial Cybercrime Response Team kadagiti umili a no adda agkiddaw kadakuada iti kuarta babaen ti GCASH ken dadduma pay a pagipatulodan iti kuarta nga iberipikada a nalaing.
Dayta ket tapnon maliklikan ti pannakalimlimo manipud kadagiti scammer a nalaing a mang-hack iti account.
Iti pannaki-uman ti Bombo Radyo Vigan ken ni Guerrero, no adda maawat a link manipud iti masuspetsa a number ket saan a lukatan ngem no kas bilang ma-hack ti account ket mabalin ti kumamang kadakuada ta adda dagiti proseso nga aramidenda.
Kinunana a saan a matrace ti Cybercrime unit ti pakabigbigan ti scammer ngem mabalin a maduktalan no asino ti akin-kukua ti account babaen ti panagapply-da iti korte iti warrant to disclose computer data agsipud ta ti GCASH ket sapulenna latta ti daytoy a banag tapno awan ti malabsing iti Data Privacy Act.
