Nangidatag ti Ilocos Sur Cyber Response Team iti addang para iti publiko no kasano a masalwadan ti bagi iti virtual tapno maliklikan ti cybercrime.
Iti pannaki-uman ti Bombo Radyo Vigan ken ni Police Executive Master Sergeant Archimedes Fernandez, nasken nga amwen a naimbag no asino ti kapatpatang iti online ken no mapagtalkan met laeng; agaramat ti strong password; liklikan ti mangibingay iti personal information; annadan ti agibingay kadagiti explicit photos and videos; ken imonitor ti privacy dagiti social media account tapno maliklikan ti posible a panag-leak dagiti ladawan.
No met adda dagiti mapagduduaan nga aramid ket nasken nga ireport nga insigida kadagiti otoridad wenno kadagiti social media platform.
Nabalakadan ti publiko a saanda nga agipatulod kadagiti nude photos ken annadan pay dagiti menor de edad nga annak tapno malilikan ti pannakaisagmakda iti online.
Impanamnama ni Fernandez a ti Cybercrime Unit ti probinsia ket agar-aramid kadagiti addang tapno masalwadan dagiti umili manipud iti krimen iti online ken agtultuloy ti inda panangiyadal no ania ti kayatna a sawen ken ania dagiti risgona kadagiti agar-aramat iti social media.
