VIGAN CITY – Nagballaag ni Police Lieutenant Colonel Greg Guerrero iti Anti- Cybercrime Unit ti Ilocos Sur Police Provincial Office kadagiti umili a no adda maaw-awatda a link ket saanda nga iclick wenno lukatan.
Dayta ket kalpasan ti pannaka-hack ti Facebook account ni Police Captain Joel Dasargo iti Sta. Maria Police Station a mangkidkiddaw iti kuarta kadagiti gayyemna iti Facebook.
Iti pannaki-uman ti Bombo Radyo Vigan ken ni PLTCOL. Guerrero, no adda dagiti agipatulod iti mensahe nga agkidkiddaw iti kuarta ket nasken a tawagan wenno personal a kapatang ti akinkukua ti account.
Ipagpaganetget ni Guerrero a ti kangrunaan nga addang ket ti saan a panang-CLICK kadagiti maawat a links tapno saan a matakaw dagiti detalye pakairamanan dagiti bank accounts.
Kabayatanna, babaen ti naipatungpal a SIM card Card Regisrtration Act ket natalek ti opisial a nadardaraston a matakuatan no siasino dagiti manglokloko iti online.
Balakadna a saan nga usaren ti social media a pangloko wenno pangdadael iti sabali a tao.
