VIGAN CITY – Agtaltalinaed nga insurgency-free ti Ilocos Sur iti baet ti panagrinnupak ti Armed Forces of the Philippines ken New Peoples Army iti nagbeddengan ti Baballasioan, Sta. Maria ken Pilar, Abra.
Iti pannaki-uman ti Bombo Radyo Vigan ken ni Vice Governor Ryan Singson, awan ti nasken a pagdanagan dagiti agindeg ta saan a ditoy ti naggapuan dagiti rebelde ken nairanrana laeng nga iti boundary ti Ilocos Sur ken Abra ti nakapasamakan ti engkwentro.
Nupay kasta, impasigurado ti bise gobernador nga agtultuloy ti pannakaiwaras ti tulong kadagiti apektado a residente iti ili ti Sta. Maria ken nagyaman ken ni Pilar Mayor Tyron Christopher Beroña iti panangasikasona kadagit agindeg iti probinsia a kimmamang iti lugarda.
Awan met ti nagbalin a parikut kadagiti kabangibang a barangay iti apektado a lugar idiay Sta. Maria ken impasiguradona a kontroladon ti kapulisan ken militar ti napasamak.
Maipalagip nga idi Abril 2, rimsua ti engkwentro iti nagbaetan ti militar ken dagiti rebelde a grupo a nakadunoran ti maysa a suldado.
Nangitunda pay met daytoy iti pannakasuspende tik lase kadagiti dadduma nga apektado a barangay.
Iti agdama, maisaysayangkaten ti clearing operation iti lugar a nakapasamakan ti engkwentro.
