VIGAN CITY – Agsagsaganan iti Ilocos Sur para iti maisayangkat a Batang Pinoy 2022 inton Disyembre nga isu ti host ita a tawen.
Iti pannaki-uman ti Bombo Radyo Vigan ken ni Provincial Sports Coordinator Ryan Vera Cruz, naisayangkaten iti inspeskyon para kadagiti pakaisayangkatan iti ay-ayam dagiti delegates ket impasiguradona nga uray adda dagiti naapektaran ti ginggined iti Hulyo ket matuloy latta iti nasao nga event ta agtigtignaydan.
Inamin ni Vera Cruz a manipod ti kuta da a nakurang nga innem a gasut a room para kadagiti delegates ket 128 pay laeng iti nasapulanda ngem manarimaanen ti panagsapulda isu nga awan ti rumbeng a pagdanagan.
Kagiddan iti covid-19 pandemic ket saan pay laeng a maisayangkat amin nga event a face-to-face ta adda laeng siam nga events a naipalubos nga isu iti archery, athletics, badminton, chess, cycling, table tennis, swimming, weightlifting ken obstacle race.
Nupay kasta, maaramid latta babaen ti virtual iti arnis, danceport, judo, karate, muay thai, pencak silat, taekwondo ken wushu a marugianen inton October.
Kabayatanna, ti Batang Pinoy 2022 ket mangrugi inton December 4 ngem tallo nga aldaw sakbay iti event ket sigurado nga agsangpetton dagiti delegates.
