Nagtataripnong ti Ilocos Sur Provincial Disaster Risk Reduction and Management Office, Philippine National Police, Bureau of Fire Protection ken dadduma pay a maseknan nga ahensia tapno saganaan ti umadani a Semana Santa inton umay a lawas.
Iti pannaki-uman ti Bombo Radyo Vigan ken ni Provincial Disaster Risk Reduction and Management Officer Rhon Arquelada, ti simbaan ti maysa kadagiti bantayanda agsipud ta isu ti manamnama a papanan dagiti tattao a pakimisaan.
Gapu dayta, addanto dagiti pannakabagi ti linteg a maideploy kadagiti simbaan iti probinsia.
Malaksid dayta, maysa pay kadagiti ipangrunada a bantayan dagiti kabaybayan ken karayan babaen iti tulong ti Philippine Coast Guard tapno maliklikan dagiti insidente ti pannakalmes a masansan a mairekrekord tunggal Semana wenno Sabado Gloria, aldaw a panagturong ti kaaduan kadagiti kabaybayan.
