VIGAN CITY- Saan nga ilibak ni Police Chief Inspector Napoleon Gao-ay, hepe ti Suyo municipal police station, nga agraira iti iligal a panaglako ti produkto petrolyo kadagiti sumagmamano a lugar idiay Suyo ngem awan iti maranaan da ta nu agpatrolya dagiti kakadua da ket agawaan met dagiti tattao nga idulin dagiti lako da.
Dayta iti gapu na nu apay a balligi para kadakuada iti pannakakemmeg ni Feliciano Awayan Tipallo Jr,. nga agtawen iti tallo pulo, naasawaan ken agnaed idiay Sitio Legab, Man-atong, Suyo iti inwayat da a buy- bust operation iti iligal a panaglako ti produkto petrolyo.
Naala ken ni Tipallo iti sangagasut a pisos a buy-bust money ken ti maysa a sangalitro ti gasolina a nakaikabil ti botelya ti softdrinks a nagserbi a buy-bust item, sabali laeng ti dua a plasic container a naglaon iti sumurok-kumurang uppat a pulo a litro ti gasolina ken sangapulo ket tallo a case ti softdrinks a naglaon iti sangagasut lima pulo ket innem a maysa litro a bote ti softdrinks nga adda karga na a gasolina.
Gapu ti dayta, kaso a panaglabsing ti Batas Pambansa Bilang 33 nga inamyendaran ti Presidential Decree 1865 wennu “An Act Defining and Penalizing Certain Prohibited Acts Inimical to the Public Interests and National Security Involving Petroleum and/or Petroleum Products.”
