VIGAN CITY – Naisakup iti General Community Quarantine ti ili a Cabugao agingga inton May 30 gapu ti panagpositibo ti tallopulo ket innem a tattao iti RT-PCR test.
Gapu ti dayta, masapul a ti Local Government Unit ket ipatungpalda ti naan-anay a pagannurotan kas ti panagusar iti facemask, faceshield, panangsurot iti social distancing, ken panagbuggo iti ima tapno masalwadan ti salun-at dagiti umili.
Malimitaran ti garaw dagiti umili ket dagiti laeng adda napateg a gagarada ti mabalin a makaruar isu a masapul nga adda maymaysa nga entry ken exit point.
Limapulo a porsiento laeng ti kapasidad a mabalin kadagiti religious gathering idinto a maipalubos laeng met kadagiti workers ken APORs nga agkabbalay ti panagkalubbon iti motorsiklo ken maysa a pasahero laeng ti lumugan iti traysikel.
Dagiti establisimiento ket masapul a mapagtalinaedda iti kinadalus ken ipatungpalda ti health protocols kasta payen a ti curfew ket manipud iti alas dyes iti rabii agingga alas singko iti agsapa.
