Impasan ti Independent Commission for Infrastructure iti Malakanyang ti report a naaramid da iti uneg ti 125 nga aldaw manipud Setyembre 15 agingga Enero 18.
Nakairekord daytoy iti ‘substantial and measurable results’ iti bet ti limitado nga opisial ken pondo.
Karaman kadagiti naaramid ti ICI ti panagipila ti siam a reklamo iti Office of the Ombudsman nga adda pakainaiganna iti innem a pulo ket lima nga indibidwal ken pannakibinnuligda iti Department of Justice para iti Immigration Lookout Bulletin Orders (ILBO) kontra kadagiti innem a pulo ket innem pay nga indibidwal.
Nakaaramid pay ti tallopulo ket dua a panagdengngeg nga adda tallopulo ket dua a testigo, pakairamanan ti duapulo ket lima a prominente a personalidad kas ti senador, kongresista ken mangidadaulo iti ahensia.
Nakaipatungpal pay ti komite ti sangapulo ket innem nga inspection iti intero a pagilian, naka-proseso ti 1, 173 a dokumento ken nagiruar ti 160 investigative communication ken 146 formal communication.
