Impaganetget ti International Criminal Court nga agtaltalinaedda nga independent ken awan kanunonganda kalpasan nga inakusaran ni Vice President Sara Duterte ti tribunal iti panagbalin a ‘tuta’ da Presidente Ferdinand Marcos Jr. ken dati a Senador Antonio Trillanes IV mainaig iti pannakakemmeg ni dati a Presidente Rodrigo Duterte.
Segun iti ICC, maysa daytoy nga international judicial institution nga agtigtignay a nawaya ken neutral kas maisurot iti Rome Statute, ken saan a mangmangted iti personal a komento kadagiti dinakamat ti Bise Presidente.
Kabayatanna, pinaglibakan ti Malakanyang dagiti pammabasul ni Duterte ken kinuna ni Trillanes a saan a kontrolado iti asino man ti ICC.
Isuna pay ti maysa kadagiti nangipila iti communication iti ICC idi 2017 tapno imbestigaran ti mapapati a pammapatay iti war on drugs.
