Pinagkedkedan ti International Criminal Court (ICC) ti panagpanggep ti kampo ni dati a Pres. Rodrigo Duterte a kontraen ti pannakadutok dagiti abogado dagiti biktima ti drug war.
Iti 15-page a pangngeddeng a nairuar idi kalman, kinuna ti ICC Pre-Trial Chamber 1 a kaaddoan kadagiti biktima nga aplikante ket kinayatda nga ipresentar ti ICC-accredited nga abogado a da Atty. Joel Batuyan ken Gilbert Andres wenno ti Office of Public Counsel for Victims (OPCV).
Da Batuyan ken Andres ket nakastrek tapno madutokan a legal representatives dagiti biktima.
Ngem segun ti kampo ti dati a presidente, dagiti nasao nga abogado ket nangibingayen ti rurodda ken ni Duterte a gappuanan iti pannakasuron iti online ken judicial trolling.
Inlawlawag ti Pres-Trial Chamber 1 a ti public opinions dagiti abogado ket saan a makaapektar iti professional duties-da ken abilidad nga agpresentar kadagiti biktima.
Imbasurada pay ti kiddaw ti OPCV tapno luktan manen ti application process para iti panagsali dagiti biktima ta isu ti mangpabuntog iti panagdenggeg iti kaso.
