VIGAN CITY – Nadumaduma a hygiene kits ken health items ti naipaay kadagiti agad-adal idiay Villamar Elementary School iti ili ti Caoayan babaen ti inwayat nga Outreach program ti Girl Scout of the Philippines-Ilocos Sur National High School Chapter nga idaulwan ni President Irene Navarro.
Ti nasao nga outreach program ket naawagan a “Gundaway nga Sagutan dagiti Patpatgen, naadaw iti acronym a GSP.”
Tunggal agad-adal ket naikkan iti alcohol, sabon, facemask ken dadduma pay a mausarda ita a Covid19 pandemic ken kas panagsaganada payen para iti limited face-to-face classes.
Malaksid ti pannakaiwaras dagiti nasao a banag, adda pay ti naaramid a feeding program ken parlor games a nangted ragsak met kadagiti ubbing iti baet ti naunday a tiempo a saanda nakaskastrek iti pagadalan gapu ti pandemya.
Nupay kasta, nagyaman ti school head a ni Evelyn Taqueban gapu ti pannakapili ti nasao a pagadalan a pakaipaayan ti nasao a programa.
