VIGAN CITY- Nakemmeg ni Jemar Viloria, agtawen ti tallo pulo ket pito, baro nga agnaed idiay Barangay San Jose, Narvacan iti naisayangkat a buy bust operation idi kalman, March 8.
Ti pannaki-uman ti Bombo Radyo Vigan kenni Police Capt. Arcadio Viloria, hepe ti Narvcan Municipal Police Station, nabayagen a sinip-siputanda ti suspek ta adda pay dagiti naawat da a report nga ususaren na dagiti menor de edad iti iligal a transaksyon tapnu maliklikan iti pannakabigbig na.
Nakuna pay ti hepe a kanayon a kadua ti suspek ti asawana isu a patienda nga ammo ti asawa na iti iligal nga aramid ti suspek ngem idi naisayangkat iti buy-bust operation idi kalman, nairana nga awan ti asawa ti suspek ngem idi napan iti police station ta napan na kinita ti asawa na, pinaglibakanna nga ammo na iti iligal nga aramid ti suspek.
Naala dagiti otoridad manipud ti suspek ti maysa a transparent heat sealed plastic sachet, innem a transparent heat sealed plastic sachet a naglaon iti mapapati a shabu nga agdagsen ti 0.8 grams nga aggatad ti PHP 5, 440; buy bust money a sangaribo a piso; maysa a coin purse; sangapulo ket pito a ribo dua pulo a pisos (PHP 17, 020); maysa a brown sling bag ken nalabbaga a notebook.
Ti agdama ket addan iti pagbaludan ti suspek ket maisagsaganan iti kaso a maipila kontra kenkuana.
