Dinayaw ni Human Rights lawyer ken dati a Bayan Muna Representative Atty. Neri Colmenares ti hearing ti House Quad Committee idi kalman inaig iti imbestigasyon iti extra judicial killing iti panawen ni dati a Presidente Rodrigo Duterte.
Iti pannaki-uman ti Bombo Radyo Vigan ken ni Atty. Colmenares a maysa met laeng a resource person iti napasamak a panagdengngeg, nasayaat ti panang-handle ti Quad comm iti hearing isu a patienna a positibo daytoy para iti pamilia ken kabagyan dagiti biktima ti war on drugs.
Daytoy ket gapu ta ad-adda manen a nanayunan ti panangamin ti dati a presidente inaig iti pannakairamanna ti extra judicial killings idi panawen ti administrasyonna.
Innayon ni Colmenares a dagitoy a panangamin ti dati a presidente ket mabalin a maaramat kontra kenkuana iti kaso a crime against humanity iti International Criminal Court.
Patien ti human rights lawyer nga adda ilimlimed ti dati a presidente no apay nga imbabawina met laeng ti immuna nga imbagana a mangipila iti waiver para iti ibagbaga ni Sen. Antonio Trillanes nga adda P2.1 billion drug money a simrek iti account ti pamilia Duterte.
Malaksid dayta, kunana pay a ti ugali ti dati a presidente iti sangwanan ti Quadcomm ket mangipakita a kabaelanna ti agaramid ti naranggas kadagiti tao a kumonkontra kenkuana kas iti napasamak a pannakaibalud ni dati a Senador Leila de Lima a maysa met laeng nga oposisyon.
