VIGAN CITY – Panangsalwad iti aglawlaw ken panangtaripato kadagiti kaykayo iti pagsentroan ti “Hug A Tree” Campaign dagiti miyembro ti Politically Inclined Students ti University of Northern Philippines nga idaulwan ti organization president a ni Christine Gisabelle Savellano.
Segun ken ni Savellano, awan iti naituding a panawen nu kasanu kabayag iti kampanya da ta agingga nga adda dagiti organisasyon wennu grupo a kayat na iti makikinnammayet kadakuada iti kalikagum da a masalwadan iti aglawlaw ken masalakniban dagiti kaykayo ket agtultuloy iti kampanya da.
Innayon na nga ad-addan to a marikna iti epekto na iti kampanya da inton maisayangkat ti agtinawen nga eco- camp ti organisasyon ta addanto ti lugar a pan da pagmulaan ti kayo.
Kabayatanna, kinunana a saan laeng a ti panagmula ti kayo iti mabalin a maitulong tapnu masalakniban iti aglawlaw nu di ket babaen pay iti pannakipaset kadagiti clean up drive ken panangdisiplina iti bagi.
