Sagsaganaan ti House Prosecution panel ti nakatuding nga oral arguments mainaig iti patangan ti 2/3 vote threshold iti agtultuloy nga impeachment trial kontra ken ni Vice President Sara Duterte.
Agisayangkat ti oral arguments iti Senate Impeachment Court inton sumaruno a lawas no sadino naimbitaran pay dagiti retirado a mahistrado ti Korte Suprema tapno malawlawagan iti husto a panag-compute ti 2/3 vote manipud iti kabuklan a miembro ti Senado, partikular kadagiti senador a saan a makipaspaset iti panagdengngeg.
Segun ken ni Atty. Hez Montalan, Deputy Spokesperson ti House Prosecution panel, nainget a suksukisoken ti legal team da ti amin a banag a mainaig iti linteg ken jurisprudence nga ipasango da iti korte.
Impaganetget ti abogado a pabor iti paset ti prosecution a baliwan ti denominator manipud iti kabuklan a 24 a senador ken ibilang laeng dagiti aktibo a makaipaspaset iti trial, ngem respetaren da latta met ti agbalin a decision ti impeachment court.
