Indeklarar ti House Committee on Justice nga adda umanay a pagbasaran ti dua nga impeachment complaints kontra ken ni Vice President Sara Duterte a mangted dalan iti panagrugi iti panagdenggeg inton sumaruno a lawas.
Segun ti House panel, saan a direkta a sinungbatan ni VP Sara dagiti alegasyon kontra kenkuana iti “Answer Ad Cautelam”, a naipila kas tignay kadagiti reklamo.
Ti dua nga impeachment complaints ket naglaon kadagiti pammabasol iti bise presidente kas iti betrayal of public trust, culpable violation of the Constitution, ken dadduma pay maipanggep iti madi a panagaramat iti P612.5 million confidential funds ken panagpangta iti biag ni Pres. Ferdinand Marcos Jr. ken ti pamiliana.
Kinuna ni House Deputy Minority Leader Leila de Lima, ti nagbalin a sungbat ti bise presidente ket saan a sumungsungbat kadagiti alegasyon.
Awan pay iti palawag maipanggep ti malversation iti pondo, anomalous disbursements wenno dagiti envelopes a naited kadagiti sumagmamano nga opisyal iti Department of Education.
Gapu dayta ket posible nga ituloy ti komite ti impeachment hearing proper, ket matratar ken maadal dagiti ebidensya ken testimonya iti agpada a complainants ken ni VP Sara.
Sakbay iti panagbibinnotos ket inlawlawag ni House Justice panel chair ken Batangas Second District Rep. Gerville Luistro a dagiti alegasyon ket nadagsen ken kasapulan iti kongkreto a sungbat.
Innayonna a mangrugi iti pormal a panagdenggeg inton March 25, 2026.
