VIGAN CITY – Agtultuloy ti hot pursuit operation dagiti militar kalpasan iti combat operation nga insayangkat da idi kalman, January 13, a nagresulta ti dua pulo a minutos nga engkuwentro kontra dagiti mapapati a miyembro ti New People’s Army idiay Barangay Taleb, Nagbukel.
Dayta iti ingunam-gunam ni Capt. Dominic Domrique, commander ti 2nd Civil Military Operations (CMO) iti pannaki-uman kenkuana ti Bombo Radyo Vigan.
Adda dagiti tent a nasarakan da idi makadanun da iti lugar a siguden a pagkamkamangan dagiti miyembro ti NPA ket atapen da nga adda dagiti nadunor kadakuada agsipud ta adda dagiti nakita da a tedted ti dara iti nakapasamakan iti engkuwentro.
Agsipud iti dayta, kidkiddawen na kadagiti agindeg iti nasao a lugar a mabalin a pagkamangan dagiti nadunor a miyembro ti NPA nga agipulong da kadagiti militar tapnu maipan iti ospital dagiti nadunor ket maagasan ken tulungan ida iti gobiyerno.
