Imbilin ni Presidente Ferdinand Marcos Jr a saan laeng a puro delata ti ipakan kadagiti biktima ti gingined.
Dayta ket kabayatan ti situation briefing idiay General Santos City kalpasan a binisitana ti kakaro ti perdision ti gingined idiay Sarangani province.
Gapu dayta, binilin ti Presidente ti Department of Social Welfare and Development (DSWD) a mangala iti food truck kadagiti lugar nga inapektaran ti napigsa a gingined ken mangted iti hot meals kadagiti apektado nga umili.
Innayon ti presidente nga adda food truck ti gobierno a maar-aramat iti feeding program tapno adda alternatibo dagiti pamilia a naapektaran iti gingined a makakaan iti simple ngem nasustansia a taraon.
Binilinna pay ti DSWD ken dagiti lokal a gobierno nga itultuloyda ti panagtulong kadagiti biktima ti gingined ken uray no nakapanawdan kadagiti evacuation center ket masapul latta nga ikkan iti food packs.
