Kinontra ni Senador Risa Hontiveros ti kiddaw ti lider ti Kingdom of Jesus Christ (KOJC) a ni Apollo Quiboloy a hospital arrest idiay Davao City.
Inunay-unay ti senador a sumangsango ni Quiboloy kadagiti seryoso a krimen kas iti human trafficking, rape, ken child abuse, isu a nasken nga agpapada ti pannakatrato dagiti akusado uray ania ti kasasaad wenno koneksionda iti biag.
Innayon pay ni Hontiveros nga awan koma ti special treatment kenni Quiboloy gapu ta kiddaw a hospital arrest idia Davao ket saan a maiyannatup.
Kinunana pay a saan koma a pilien ni Quiboloy no sadino ti pakaibaludanna gapu ta awanen iti uneg ti “King Dome” isu a saanen nga agtignay a kas iti Dios.
Immunan a kinuna ni Philippine National Police (PNP) Spokesperson Police Colonel Jean Fajardo a kiniddaw ti kampo ni Quiboloy ken ti sabali pay a kaduana nga akusado a ni Ingrid Canada iti branch 159 ti Pasig City Regional Trial Court (RTC) para iti hospital arrest idiay Davao.
