Natalek ni Senador Risa Hontiveros a pumigsa ti oposisyon iti kongreso kalpasan a nakastrek iti Top 5 senatorial race dagiti da Bam Aquino ken Kiko Pangilinan idinto nga umuna met iti partylists ti Akbayan ni Atty. Chel Diokno ken nakastrek pay ti Mamamayang Liberal Partylist ni dati a Senador Leila De Lima.
Segun ken ni Hontiveros, saan laeng daytoy a simple a ‘comeback’ wenno panagsubli dagiti nabayag a Naawan iti kongreso.
Natalek ti senador a daytoy ti bunga ti talek ken panagtignay dagiti umili ken ti pagkasapulan a maaddaan iti timek.
Impasiguradona a ti sumaruno a kongreso ket ikkanda iti importansya ti kiddaw dagiti umili iti pannakaingato ti sueldo, panagbaba ti presyo ti taraon, ken nalaka nga edukasyon ken panangdusa kadagiti saan a napudno nga agtuturay.
