Nangrugin ti panagiwaras kadagiti honoraria kadagiti mangisursuro a nagserbi iti 2025 National and Local Elections kas kinuna ti Commission on Elections (Comelec).
Segun ken ni Director John Rex Laudiangco a pannakangiwat ti Comelec, rumbeng a turongen dagiti mangisursuro iti election officer-da tapno maala ti honoraria.
Umabot iti P9,000 agingga P12,000 ti maawat dagiti nagserbi iti eleksyon kalpasan nga inaprubaran ti Department of Budget and Management (DBM) ti nayon a P2,000.
Kasaruno ti Election Service Reform Act ket masapul nga ited ti poll body ti honoraria iti uneg ti sangapulo ket lima nga aldaw kalpasan iti eleksyon.
Kabayatanna, awan ti naawat ti Comelec a report mainaig kadagiti mangisursuro a nakapasar iti kinaranggas idi napalabas nga eleksyon.
