VIGAN CITY – Naipasdeken ti Home for the Aged iti ili ti Narvacan babaen iti panangidaulo ni Mayor Luis “Chavit” Singson ken ni Vice Mayor Pablito Sanidad agsipud iti kalikagumda a maipangruna dagiti senior citizen tapno adda lugar a pakataraknan kadakuada nangruna kadagiti awanen ti pagkamangan ken kabagianda.
Idi kalman, Mayo 23 ti inagurasyon ti nasao a pasdek nga indaulwan dagiti opisial iti nasao nga ili.
Ti Home for the Aged a naawagan iti INAnaMA wenno Hope for the Aged Center idiay Barangay Margaay ket paset ti Build Build Build Program Aramid Pakakitaan ti lokal a gobierno.
Malaksid dayta, mangipapaay pay ti lokal a gobierno iti PHP50K a maited kadagiti Narvacanean centenarian.
Kabayatanna, iti met laeng asideg ti nasao a pasdek ket nainaguraran met laeng idi kalman ti Children and Orphan Center a ti gagemna ket matulongan met dagiti naul-ulila nga ubbing wenno dagiti nabaybay-an nga awanen ti mangaywan kadakuada.
Imanehar daytoy ti LGU Narvacan babaen iti pannakitinnulong ti DSWD ken RHU a mangpatanur kadagiti ubbing nga agserbinto met a namnama ti masakbayan.
