Pinalagipan ti Department of Labor and Employment dagiti pribado nga employer a nainget nga ipatungpalda dagiti regulasyon iti pasueldo inton Disyembre tapno masigurado a makaawat iti husto a kompensasyon dagiti mangmangged iti panawen ti Paskua.
Naibilang a special non-working days ti Dec. 8 (Feast of the Immaculate Conception), Dec. 24 (Christmas Eve), ken Dec. 31 (New Year’s Eve).
Ti met Dec. 25 (Christmas Day) ken Dec. 30 (Rizal Day) ket regular holidays.
Dagiti empleado a saan nga agtrabaho iti special non-working days ket masansan a saan a nasken nga umawat iti sueldo, malaksid laeng no adda patakaran ti kompania wenno katulagan.
Dagiti agtrabaho ket makaawat iti nayon a 30 percent iti basic wage-da para iti umuna a walo nga oras, ken 30 percent para iti overtime.
No ti aldaw ket nairana a rest day, ti umuna a walo nga oras ket mabayadan iti 50 percent nasursurok ngem iti basic wage.
Para iti regular holidays, dagiti saan nga agtrabaho ket makaawat iti 100 percent nga inaldaw a sueldo no present wenno naka- paid leave da iti napalabas nga aldaw.
