VIGAN CITY – Iyar-arungaing dagiti agtartaraken iti baboy iti ili ti San Ildefonso nga awan koma pay laeng ti sumrek a frozen iti lugarda tapno maidispose pay nga umuna dagiti baboy a tarakenda.
Iti pannaki-uman ti Bombo Radyo Vigan ken ni Barangay Captain Esperanza Fetalvero, kiddawenna ti panagtignay dagiti agtuturay tapno isuda ti mangtengngel ti pannakaiserrek dagiti frozen meat ket maited kadakuada ti gundaway nga agtaraken ken mailako dagiti dingwenda nga isu ti pagbibiaganda.
Maysa kadagiti pagsakitan ti nakemda ti nalaka a presyo ti baboy gapu ta nangina met dagiti pagpakadanda a feeds.
Gapu ti pannakaimaldit ti African Swine Fever iti segundo distrito ti probinsia, kayatda a mabantayan a nalaing tapnon saan a makadanun iti umuna a distrito ta kunana a saanda pay a nakalunglung-aw manipud iti epekto ti ASF kadakuada idi tawen 2021.
