Nagballaag ni Police Major Jordan Sambo iti Highway Patrol Group kadagiti negosyante nga agpapaupa iti luganda ken dagiti aggangandat a serken ti kastoy a negosyo, tapno saanda a mabiktima.
Iti pannaki-uman ti Bombo Radyo Vigan ken ni Sambo, ti Rentangay, Renta Sangla ken Renta Benta ket mapaspasamak babaen iti panagupa iti lugan ti customer a kabaelanna ti manglimlimo.
Gapu dayta, nasken a saan nga agtalek unay kadagiti agup-upa a saan nga am-ammo wenno kinadua laeng ti am-ammo, agup-upa iti balay/apartment ken awan ti permanente nga address-na iti masakupan a lugar.
Saan nga agtalek kadagiti nalaing a makisarita tapno laeng maala ti rikna ti kayatda a biktimaen.
Masapul nga agingga maysa laeng a lugan ti ipaupa ken saan nga umanamong a mayatiddug ti aldaw a napagtulagan agingga a saan pay a nakitkita ti lugan.
Saan nga agpaupa nga insigida kadagiti walk in customers, pagbalinen a patakaran ti “booking system” wenno panagpareserba.
Sapulen kadakuada ti dua a valid ID, mangikabil iti secret GPS tracker kadagiti lugan, ken saan a dagus a maallukoy iti dakkel a bayad ti upada ta dakdakkel ti mapukaw iti agpaupa.
Mabalin met ti agaramid iti bukod a patakaran a mabalin a makatulong tapno maliklikan ti pannakabiktima iti Rent A Car Business.
Nagpanawagan ni Sambo iti panagkaykaysa tapno maparmek ti nasao a modus numan pay ita a tawen ket awan dagiti nairekord a kastoy a pasamak.
