VIGAN CITY – Kaso a panaglabsing iti Comprehensive Dangerous Drugs Act of 2002 ti sangwen ti drug suspect a nakemmeg idiay Brgy. Sisim, Cabugao babaen iti search warrant operation.
Ti suspek ket ni Anthony Serdenia, agtawen iti duapulo ket walo nga agnaed iti nasao a lugar, High Value Individual, Regional Top Priority Target iti Illegal Drugs ken konektado kadagiti naglabas nga insaysayangkatanda ti operasyon.
Iti pannaki-uman ti Bombo Radyo Vigan ken ni Police Captain Franco Catalan, datin nga aglaklako ti iligal a droga ti suspek ngem pinaglibakanna ken naglabsing pay kadagiti quarantine protocols ita a Covid19 pandemic.
Naala iti uneg ti pagtaenganna ti maysa a nangisit a sling bag a naglaon iti maysa a pitaka a naglaon iti maysa a white ken orange a nakaikargaan dagiti walo a bassit a heat sealed transparent sachet ti shabu nga agdagsen iti nasurok kumurang maysa a gramo nga aggatad iti innem a ribo walo gasut a pisos ken uppat a pulo a medium size ti awan kargana a sachet.
Nupay kasta, nakakustodiyan ti suspek kadagiti pannakabagi ti linteg pakairamanan dagiti naala kenkuana tapno maidalan iti husto a proseso.
