Papaimbestigaran ni Deputy Speaker Janette Garin ti imbutaktak ti beterano a kolumnista a ni Mon Tulfo nga umabot iti P250 milion a gatad ti expired nga agas ti limed nga impaibelleng ti Department of Health.
Maibasar iti informant ni Tulfo iti DOH, planon nga isayangkat ti limed a disposal iti agas a paset iti ginatang ni Herbosa ngem saan a naited kadagiti agkasapulan a pasyente.
Segun ken ni Garin, ammuenda no ania ti pagkurangan ni Herbosa iti panag-expire dagiti agas a ginatangna numan pay adu a Pilipino ti saan a makagatang iti agas para kadagiti sakitda gapu iti kinarigat.
Madanagan pay ni Garin iti report a maikali dagiti expired nga agas iti daga gapu iti epektona iti aglawlaw ken salun-at dagiti tao.
Inlawlawag ti kongresista nga adda husto a wagas iti disposal dagiti expired nga agas a nasken a suroten ti DOH.
