VIGAN CITY – Kiddawen ni P/Capt. Arcadio Viloria, hepe ti Narvacan municipal police station kadagiti amin nga agindeg iti nasao nga ili a sumurotda iti paglintegan inaig ti nainget a kampania tatta kontra iti illegal gambling.
Ti nasao a banag ket kalpasan nga adda iti nakemmeg iti lugarda a nagsusugal ken kasaruno iti impatungpal ti Philippine National Police a paglintegan inaig ti panangparmek iti iligal a sugal.
Segun ken ni Viloria, binalakadannan dagiti kapitan iti tunggal barangay ti Narvacan tapno makitinnulongda ken ingunamgunamna met kadagiti sukir a nu makemmeg da ida ket tallo pulo ket uppat a ribo a pisos ti pyansada isu a nasaysayaat a sumurotda iti paglintegan.
Kabayatanna, kaso a panaglabsing ti Presidential Decree 1602 ti sangwen dagiti uppat a nakemmeg idiay Brgy. Paras, Candon City iti naiwayat nga anti illegal gambling operation.
Nabigbig dagiti suspek a da Akbar Sanchez, agtawen ti tallopulo ket walo, maysa nga aglaklako; Emma Arellano, agtawen ti innem a pulo ket dua; Norma Damasco, agtawen ti pitopulo ket uppat nga agpapada nga agnaed iti Brgy. Paras ken ni Marcelino Galima, agtawen ti pitopulo ket uppat, maysa nga aglaklako ken agnaed iti Brgy. Calaoan.
Agpapada a naaktuan dagiti suspek nga agma-mahjong ken naala kadakuada ti maysa set ti mahjong tiles ken pusta da nga aggatad ti tallo gasut uppat a pulo ket lima a pisos.
