Pinaglibakan ti kampo ni dati a Bulacan 1st District Engineering Office Engineer Henry Alcanatara ti agwarwaras a damag nga imbabawina dagiti testimonyana dagiti panagdenggeg iti Senate Blue Ribbon Committee.
Segun ti legal counsel-na a ni Atty. Emil Karlo Joven, awan iti aniaman a panagsanud wenno panagbabawi iti sinarita ni Alcantara isu nga inawaganna ti damag a saan a pudno ken misleading.
Kinuna ni Atty. Joven nga adda Memorandum of Agreement ni Alcantara iti Department of Justice (DOJ) kas paset iti panagserrekna iti Witness Protection Program.
Agtaltalinaed a napudno ken nakasagana a makitinnulong ti DOJ ni Alcantara iti panangsapul iti kinapudno.
Innayonna a ti panagadal dagiti sarita ni Alcantara ken dadduma pay a karaman kadagiti kaso ket rumbeng nga ipaima kadagiti prosecutor kasaruno ti linteg ken husto a proseso.
Nagpanawagan ti kampo ni Alcantara iti publiko nga agbalin a naalibtak ken mangnamnama ti verified ken mapangnamnamaan a source kangrunaan no nagtaud iti DOJ wenno iti abogadona.
